Jesús Vázquez: “Avalarei o que decidan os membros do meu partido”

O alcalde de Ourense, o popular Jesús Vázquez, manifestou este luns, en relación á moción presentada por todos os grupos da oposición no Concello ourensano que reclama a dimisión de Manuel Baltar como presidente da Deputación provincial, que el avalará “o que decidan os membros” do seu partido.

“O pleno é un lugar de debate e estamos dispostos a debater calquera moción que presenten os grupos”, sinalou antes de coñecer o contido da moción promovida por Democracia Ourensana, PSOE e Ourense en común. “Avalarei o que decidan os membros do meu partido”, aseverou.

“É un tema que levaron os grupos da oposición co máximo secretismo e non sei nada dela”, admitiu o rexedor. En todo caso, Jesús Vázquez comentou que “son todos contra un e, mesmo, diría que son todos contra o PP”. “A miña ética está por riba de todo, avalarei o que decidan os membros do meu partido”, insistiu.

PRETENDEN “IR AO ASALTO”

Malia ratificarse no descoñecemento do texto exacto da moción rexistrada este luns, o rexedor afirmou que van esperar. Ademais, dixo ter a sensación de que “neste momento o que se pretende é ir ao asalto”. “E parten do suposto de que o PP ten que aguantalos unha e outra vez”, lamentou.

O alcalde de Ourense fixo unha chamada á corrección de todos os grupos e os concelleiros de cara á sesión deste venres da Corporación Municipal. “Espero que se respecte a opinión de todos e que o pleno transcorra con normalidade”, concluíu.