Íñigo Méndez de Vigo confía en que a apertura da Porta Santa sirva para acrecentar o fervor polo Camiño

Visita do ministro á exposición

O ministro de Cultura, Íñigo Méndez de Vigo, asegurou este martes que a apertura da Porta Santa da Catedral de Santiago o próximo 13 de decembro, con motivo do Ano Xubilar da Misericordia, “favorecerá enormemente” a afluencia de peregrinos á cidade e confiou en que sirva para “acrecentar o fervor polo Camiño” e para “impulsar a economía”.

Tras participar en Santiago nunha visita á nova exposición permanente do Museo das Peregrinacións, o ministro confirmou que prevé volver á cidade para a apertura da Porta Santa e que se convocará tamén o Consello Compostelano con motivo deste evento.

“O que temos que facer é contalo moito, para que veña moita xente”, explicou Méndez de Vigo, que confiou en que a decisión eclesiástica sirva para “acrecentar o fervor polo Camiño” e tamén “para impulsar a economía de Galicia e do resto das provincias polas que pasa” a ruta.

Íñigo Méndez de Vigo ratificou o seu compromiso coa promoción do Camiño de Santiago, algo no que “cree ferventemente”, recordando que se os palentinos queren” durante a próxima lexislatura será “deputado palentino”, dende onde terá a oportunidade tamén de apoiar a ruta.

MUSEO DAS PEREGRINACIÓNS

O ministro de Cultura visitou na tarde deste martes a exposición permanente da nova sede do Museo dás Peregrinacións, situada na Praza de Platerías e aberta ao público o pasado sábado. Na visita estivo acompañado polo presidente da Xunta, Alberto Núñez Feijóo, a directora de Turismo de Galicia, Nava Castro, o conselleiro de Cultura, Román Rodríguez, e o alcalde de Santiago, Martiño Noriega, entre outras autoridades.

Tras o percorrido, Méndez de Vigo asegurou que este museo é o “complemento ideal” para os peregrinos que chegan a Santiago a través do Camiño e confiou en que tamén teña unha grande aceptación con motivo da apertura da Porta Santa o próximo mes de decembro.

En declaracións aos medios, o ministro recordou que formaba parte do Consello de Europa no ano 1987, cando este organismo declarou o Camiño primeiro itinerario cultural europeo. “Volver a Santiago case 30 anos despois para ver o museo das peregrinacións é a culminación dun sono”, sentenciou.

Ao mesmo tempo, o responsable de Cultura eloxiou o papel desempeñado polo Consello de Europa na “balización” do Camiño e, polo tanto, no seu “florecemento”, algo que cualificou de “emocionante”.

Finalmente, no “capítulo das emocións”, Méndez de Vigo confesou que este martes aproveitou a súa estanza en Galicia para visitar o presidente galego Gerardo Fernández Albor, ao que viu “en moi boa forma” aos seus 98 anos.