Ferreiro e Noriega coinciden en eloxiar as listas de En Marea

Os alcaldes de Santiago, Martiño Noriega (Compostela Aberta), e A Coruña, Xulio Ferreiro (Marea Atlántica), coincidiron este luns en eloxiar as “magníficas” listas electorais da coalición En Marea –impulsada por Anova, Esquerda Unida e Podemos– e auguraron que a formación será capaz de xerar unha “onda de ilusión” nas próximas eleccións xerais do 20 de decembro.

En declaracións aos medios antes de participar nun acto en Santiago, o alcalde da Coruña cualificou de “magníficas” e “plurais” as listas da formación, xa que inclúen “xente dos partidos da coalición” e “de movementos cidadáns”.

“Creo que son unhas moi boas listas que van seguro obter uns bos resultados nas eleccións xerais”, explicou o rexedor coruñés, quen destacou que “a conexión coas mareas” desta coalición é “indubidable”.

Sobre o proceso de conformación da candidatura, Xulio Ferreiro admitiu que “as cousas sempre poden facerse mellor”, aínda que destacou que “o perfecto é inimigo do bo” e apostou por “empurrar para que esta lista teña o mellor resultado nas eleccións” xerais.

UNHA ONDA DE ILUSIÓN

Na mesma liña, o alcalde de Santiago asegurou que a candidatura de En Marea “representa o espírito da unidade popular”, cunhas candidaturas “onde se mestura xente nova”, “xente cidadá”, persoas “non adscritas a partidos” e representantes “de sensibilidades partidarias diferentes”.

Con este panorama, o rexedor compostelano sinalou que En Marea “pode representar dignamente ao país” e “xerar unha onda de ilusión” entre a cidadanía.