Este sábado chega a I Liga de Atletismo da Mancomunidade de Ordes

Máis de 200 atletas de todas as idades participarán desde este sábado e durante as dúas vindeiras fins de semana na I Liga de Atletismo da  Mancomunidade de Ordes. Unha competición especialmente dirixida a todas e todos os atletas empadroados nalgún dos sete concellos da comarca (Cerceda, Frades, Mesía, Tordoia,Trazo, Ordes e Oroso).

As probas terán lugar na tarde dos sábados 7, 14 e 21 de novembro de 17 a 19 horas nas pistas de atletismo da cidade deportiva de Vista Alegre (Ordes).  Nesta primeira xornada terán lugar competicións de velocidade e lanzamento; o segundo día as de saltos, lanzamentos, máis carreiras de valados; e por último será a proba final de cross de resistencia.

No que se refire aos premios cada sábado farase entrega de tres medallas aos mellores tempos e puntuacións de cada categoría. Tamén haberá un equipo gañador que será o concello con máis medallas de ouro, ademais de subir ao podio aqueles participantes dos concellos que logren os tres primeiros postos para recibir as copas respectivas. Por último haberá sorteo de agasallos entre todas e todos os atletas.