Arturo Ripstein: “Con Buñuel convencinme de que non había outro camiño que ser director”

Rolda de prensa de Arturo Ripstein

Fillo dun produtor de cinema comercial, o mexicano Arturo Ripstein descubriu grazas a Luis Buñuel que había “cousas alternativas” no mundo do celuloide e, con 15 anos, determinou a súa vocación. “Con Buñuel convencinme de que non había outro camiño que ser director”, confesa.

Ripstein viaxou estes días ata Santiago de Compostela para recibir este xoves o Premio Cineuropa 2015, nun acto que terá lugar no Teatro Principal e ao que seguirá a proxección da súa película ‘Profundo Carmesí’, dirixida en 1996.

Nun encontro cos medios este mércores, o cineasta mexicano agradeceu que o seu nome se sume ao “moi notable” grupo de premiados por este festival, que, ironizou, ve “merecido”. “Por suposto que o merezo, aínda que solo sexa por anciano”, chanceou.

Ripstein dedicou ao cinema medio século da súa vida e recoñece nas súas películas unha “fascinación polo escuro”, polo “terrible” e polo “pesimista”, así como polos “superviventes” ás traxedias. “Non son alleo ao que perpetro”, destacou o cineasta, que se inspira sobre todo no seu país, México.

Nesta liña, recoñeceu o cinema mexicano que se fai fóra dos circuítos máis comerciais, así como o “indiscutible talento” de nomes como Alejandro González Iñárritu ou Guillermo del Toro, de quen, non obstante, rexeitou que estean a facer “cinema mexicano”.

“Non se pode facer cinema mexicano con Sandra Bullock”, criticou Ripstein, “que decidiran irse a Hollywood é arriscado, porque moitos van e poucos o conseguen, e é de recoñecer, pero que estean a facer películas mexicanas, pois non”, sentenciou.

OS INICIOS CON BUÑUEL

Ripstein, fillo dun produtor que “facía cinema moi convencional” e “orientado a ser de lucro”, descubriu con 15 anos, cunha película de Luis Buñuel, que “había cousas alternativas” no mundo do celuloide.

Do director español, recoñece, le “fascinou” a súa “ferocidade”, e destaca o “certo cariño” que lle tomou en sucesivos encontros en México mentres intentaba achegarse ao seu enfoque e ao doutros directores, contactos que se iniciaron cando un Ripstein case adolescente se presentou na casa de Buñuel e este, tras mostrarlle ‘Un can andaluz’, le “pechou a porta nos narices”.

Non obstante, Ripstein rexeita que Buñuel fose un referente central para el, dado que contaba con outros referentes na dirección que lle achegaban “máis cousas” e aos que se parecer.

FESTIVAL CINEUROPA

Ante os medios, Arturo Ripstein cualificou de “privilexio” poder participar no Festival Cineuropa, que “aglutina practicamente todo o bo que se fai” no celuloide.

“Hai festivais con películas comerciais e con alfombras vermellas e hai festivais con bo cinema, e este é un deles”, destacou o director mexicano, quen engadiu que no mundo “hai moi poucas películas boas” ao ano”.