Antonio Hernando considera que Baltar non debería seguir nin un minuto máis á fronte da Deputación de Ourense

O voceiro do PSOE no Congreso, Antonio Hernando, asegurou que o presidente da Deputación de Ourense, Manuel Baltar, “non debería seguir nin un minuto máis” á fronte desta institución.

“É indignante que o presidente dunha institución a use coma se fose o seu casal persoal, ofrecendo postos de traballo a cambio de favores indescritibles”, considerou o dirixente socialista este venres durante unha visita a Ourense.

O voceiro dos socialistas na Cámara baixa defendeu que a denuncia dunha muller que acusou a Baltar de ofrecer un traballo a cambio de sexo “non é unha cuestión persoal” senón que é “de ética política”. “E cando o presidente dunha institución pisa a ética política, creo que o mínimo é que deixe o seu posto canto antes”, apuntou.

Así mesmo, instou o presidente da Xunta, Alberto Núñez Feijóo, a desautorizar o titular da Deputación ourensana e dicirlle que “abandone inmediatamente a presidencia” da institución.

LOITA CONTRA A VIOLENCIA DE XÉNERO

Por outra banda, Hernando avanzou que o próximo día 25 de novembro o Partido Socialista organizará un acto con asociacións para destacar a importancia da loita contra a violencia de xénero, convencido de que o Goberno de Mariano Rajoy “non tomou o tema suficientemente en serio”.

“Estivemos a reivindicar permanentemente un pacto social, político e institucional contra a violencia de xénero”, recordou para criticar que o Goberno fixese “caso omiso” a esta petición a pesar de que, no que vai de ano, 45 mulleres foron asasinadas polas súas parellas.

Por iso, o voceiro socialista reclamou “máis ímpeto” para combater esta “lacra”. Deste modo, avanzou que se o secretario xeral do PSOE, Pedro Sánchez, é o próximo presidente do Goberno dará a “máxima importancia” á violencia de xénero e reactivará a primeira lei aprobada por José Luis Rodríguez Zapatero sobre esta cuestión.

Do mesmo modo, Hernando destacou que, se gobernan, os socialistas tamén darán a “máxima importancia” á igualdade. Sobre esta cuestión, puxo como exemplo os “resultados desalentadores” para as mulleres, que teñen “peores empregos” e “están peor pagadas mesmo no mesmo traballo. “Precariedade é sinónimo de muller aquí en Ourense”, lamentou.