A concesionaria de comedores á que a Xunta rescindiu contratos renuncia a encargarse do servizo en Santiago

A empresa concesionaria de comedores á que a Consellería de Educación rescindiu o pasado mércores os contratos de 20 centros por “incumprimento grave” nas condicións de calidade renunciou este venres a encargarse deste servizo en varios centros do Concello de Santiago. Tal e como explicou o alcalde de Santiago, Martiño Noriega, a empresa de cátering Pérea Vermellas S.L. solicitou a “non adxudicación do contrato do servizo de comedores escolares no Concello compostelano para os cursos escolares 2015-2016 e 2016-2017.

“Debido ás queixas e acusacións recibidas por parte dos centros que ata o día de onte serviamos na Comunidade Autónoma de Galicia, para non agravar máis a situación e en vista de que, inicialmente, non somos ben recibidos en Santiago de Compostela, solicitamos a non adjudicacion do contrato”, pediu a empresa nun comunicado remitido á Casa do concello e que foi lido polo rexedor.

A este respecto, Noriega subliñou a “interlocución directa” que o Concello mantivo coa empresa de cátering, na que mostrou a “preocupación” e a “alarma social” tras rescindirlle a Xunta os contratos de 20 centros educativos por “incumprimento grave” nas condicións de calidade. Tamén agregou que a empresa perdeu volume de negocio coa suspensión da Xunta.

“Agradecemos á empresa a renuncia e a súa comprensión porque era un proceso complexo”, resolveu o rexedor compostelano a este respecto tras ser cuestionado polos medios.

A liña seguida, Noriega subliñou a situación á que se enfrontou a Casa do concello ante este asunto: “A Xunta viña dun procedemento administrativo onde xa adxudicase e onde se empezase a prestar o servizo, e iso permitíalle suspendelo baseándose nuns feitos”, relatou, para logo facer fincapé en que, no caso do Concello de Santiago, era “diferente”, pois había unha adxudicación, pero o servizo non se comezase a prestar.

Neste sentido, recordou que facer unha rescisión dun contrato “sen ter sustanciado directamente unha mala prestación” podería ser “claramente considerado prevaricación”. Con todo, si admitiu que ao Goberno local lle preocupaba a “alarma social xerada” debido aos “antecedentes”, polo que adoptou unha “posición vixiante” e se puxo en contacto coa comunidade educativa e a federacion de anpas.

REUNIÓN DA MESA DE CONTRATACIÓN

Así as cousas, ao non haber adxudicación do servizo de comedores escolares na Xunta de Goberno local deste venres, a próxima semana, a poder ser o luns, volverase reunir a mesa de contratación para adxudicar este servizo, segundo todo parece apuntar, a “seguinte empresa” do concurso, dependente de ‘Ruta Xacobea”.

Preguntado por se cabería a posibilidade de volver realizar o concurso e cambiar as condicións, Noriega indicou que non e ha subliñado que “non hai prego perfecto que impida que isto poida suceder”.

POSIBILIDADE DE MUNICIPALIZAR O SERVIZO

O alcalde de Santiago tamén foi preguntado pola posibilidade de municipalizar o servizo de comedores escolares, ao que respondeu que hai que ser “conscientes” de que os procesos de municipalización “requiren tempo” e “boa planificación”.

Ademais, opinou que estes procesos, coa Lei de Racionalización e Sostenibilidad de la Administración Local, son “complexos”. Así, argumentou que o municipio de Ames puido municipalizar este servizo porque o impulsou “antes”, sen as “trabas” desta lei.

Sobre esta posibilidade, tamén vai un “problema” a “cuestión do persoal”: “Porque hai taxa de reposición cero e non podes aumentar equipos municipais”, finalizou.