Unha profesora declara que Asunta estaba como sonámbula un día de xullo

Unha profesora da escola de altos estudos musicais onde tomaba clases Asunta declarou que a nena estaba como “sonámbula” un día de xullo de 2013 no centro, ao que a levou o seu pai, Alfonso Basterra, e onde a recolleu a súa nai, Rosario Porto.

Ambos asisten á súa intervención no xuízo para esclarecer o crime da súa filla, do que están acusados e polo que o fiscal pide 18 anos de cárcere. Previamente pasaron pola sala a coidadora da menor, unha veciña e dúas nais de compañeiras de Asunta.

“A min non me atendeu cando lle chamei a atención na aula. Polo que me comentaron non era capaz de tocar, tiña clase de orquestra e clase de piano, programara un pequeno concerto pola tarde e quitárona deste concerto porque visiblemente non podía coordinar”, expuxo.