Turismo de Bueu adéntrase no outono con actividades en Cabo Udra e Area de Bon

Tras un verán ateigado de actividades destinadas a todos os públicos e de custe gratuíto, Turismo de Bueu adéntrase no outono con máis actividades en Cabo Udra e Area de Bon. En concreto, Bon acollerá este sábado un Obradoiro e concurso de papaventos , de 11 a 13 horas, e no que poderán participar ata 20 rapaces e rapazas de entre 6 e 14 anos. As inscricións poden realizarse chamando aos teléfonos 986 32 43 96 e no 699 996 685. No caso de chuvia, esta actividade trasladarase á Aula de Natureza de Cabo Udra.

Ademais, o sábado 31 de outubro desenvolveranse dúas actividades seguidas pola mañá na Aula de Natureza de Cabo Udra. A primeira será de 11 a 12 e será unha ruta guiada para o coñecemento da riqueza e variedade de fentos, seguida dunha ruta para o coñecemento do patrimonio militar de 12 a 13 horas. Estas dúas actividades irán destinadas a todos os públicos e hai un límite de corenta prazas.