Rosario Porto asegura que a última vez que viu a Asunta viva foi ao lado da súa casa

Rosario Porto asegurou ao fiscal que a última vez que viu con vida á súa filla Asunta Basterra foi ao lado da súa vivenda en Santiago, na confluencia de República Arxentina coa praza de Doutor Ponte Castro, a onde a trasladou en coche dende a casa de Montouto, en Teo (A Coruña).

Segundo a versión que está a manter Porto ante o representante do Ministerio Fiscal, ambas as dúas, nai e filla, foron ata a casa de Teo para recoller roupa de verán para pasar a fin de semana en Vilanova de Arousa (Pontevedra) e tamén para ventilar.

Pero, unha vez alí, a menor pediulle regresar ao piso de Santiago para rematar os seus deberes, segundo o relato de Rosario Porto, que argumentou que é “moi despistada” para xustificar que quedase “a compra sen facer”, pola bóla para exercicios de ballet que pensaba comprar en Decathlon, pero que non adquiriu despois de ir ata o establecemento.