Povisa atópase á vangarda en España en operacións de próstata

Povisa converteuse no primeiro hospital de Galicia e un do catro únicos hospitais de España en dispor de láser holmium de última xeración, o que permitirá dar un salto exponencial na eficacia cirúrxica, a recuperación e o benestar dos pacientes operados de hiperplasia de próstata.

A adquisición deste equipo, valorado en máis de 200.000 euros, reduce substancialmente os tempos da intervención e logra uns niveis de coagulación que evitan perdas de sangue significativas, até o punto que os pacientes non necesitan transfusións. Este novo láser permite tamén, ao contrario que outras tecnoloxías que “queiman” o adenoma, illalo e trocearlo para proceder á súa análise anatomopatolóxico, e pode ser utilizado para operar adenomas de calquera tamaño. Con outras técnicas, a partir de 80cm³ de volume da próstata está indicada a cirurxía aberta, co que iso supón de sangrado, molestias para o paciente e longos tempos de ingreso.

O novo Holmium 120 foi presentado como gran novidade mundial no último Congreso Europeo de Uroloxía, celebrado en abril do ano pasado en Estocolmo. Catro meses despois, o servizo de Uroloxía de Povisa converteuse no primeiro de España en probalo e, tras concluír un exhaustivo proceso de formación, o hospital adquiriu o equipo e xa comezou a operar con el, tanto para a hiperplasia de próstata como para as pedras de ril, uretra e vexiga, onde demostrou a mesma efectividade.

Cara á cirurxía ambulatoria da próstata

Por mor dos excelentes resultados cirúrxicos do novo láser, o servizo de Uroloxía de Povisa traballa na actualidade no desenvolvemento dun protocolo para que os pacientes con hiperplasia de próstata poidan ser operados por vía ambulatoria e se incorporen rapidamente á súa vida normal, o que supón un cambio revolucionario para unha patoloxía que a miúdo necesitaba de até catro días de ingreso. Actualmente, os pacientes operados en Povisa co novo láser danse de alta ao día seguinte e sen necesidade de levar sonda ao seu domicilio.

A hiperplasia de próstata afecta á metade dos homes por encima de 45 anos e caracterízase, dependendo da súa gravidade, por producir molestias, dificultades e bloqueos na micción. Na actualidade existen poucos tratamentos realmente efectivos que reduzan a próstata, coa desvantaxe de que provocan efectos secundarios que afectan á esfera sexual.