Política Social aumentará a colaboración co Proxecto Home que desenvolve a fundación Monte do Gozo

A Consellería de Política Social, que dirixe José Manuel Rey Varela incrementará a colaboración co programa educativo e terapéutico “Proxecto Home” que desenvolve a Fundación Monte do Gozo e que ten como finalidade a atención, rehabilitación e inclusión social e laboral de persoas en situación de vulnerabilidade. Así o indicou Rey Varela trala reunión que mantivo hoxe co director deste programa en Galicia, Ramón Gómez Crespo, e que se enmarca na rolda de xuntanzas que está a manter con axentes, organizacións e colectivos que traballan diariamente no ámbito social.

O titular autonómico salientou a importancia que ten o “Proxecto Home” para conseguir a integración harmónica e satisfactoria de persoas con problemas de adición no ámbito familiar, social e laboral, de aí que “a nosa vontade sexa blindar este programa cun maior esforzo económico que en anos anteriores”, dixo. Neste sentido, e a través da Dirección Xeral de Inclusión Social, de cara ao vindeiro ano firmarase un novo convenio de colaboración para continuar colaborando neste programa. Está previsto que o importe do acordo para 2016 aumente un 10% con respecto ao convenio vixente, até chegar aos cerca de 150.000 euros. Ademais deste reforzo económico, Rey Varela amosou interese en colaborar na posta en marcha dun proxecto piloto de inserción laboral centrado no medio rural coa finalidade de favorecer a dinamización deste contorno.

O “Proxecto Home” lévase a cabo en dispositivos que a Fundación Monte do Gozo ten nas localidades de Santiago, Vigo, Ourense, Lugo, A Coruña e Pontevedra. Os programas que se realizan inclúen alternativas residencias e obradoiros ocupacionais encamiñados á mellora de habilidades e á consecución dun emprego, incluída a mediación laboral