Policía Local e Bombeiros participarán nunha xornada de sensibilización de accidentes no CEIP Someso

Unha dotación da Policía Local e outra de bombeiros participarán mañá, 29 de outubro, desde as 10.30 horas, nunha xornada no CEIP Someso co obxectivo de sensibilizar á comunidade educativa para diminuír os accidentes. Entre as actividades da mañá, organizadas coa colaboración do Concello da Coruña, a Cruz Vermella e Stop Accidentes, haberá un simulacro de accidente de tráfico no que os servizos de emerxencia desenvolverán un escenario o máis real posible: o equipo de Bombeiros excarcerará as persoas atrapadas e controlará o posible incendio; a Cruz Vermella avaliará o estado de saúde das vítimas, aplicación de RCP e traslado cara aos centros de saúde; e a Policía Local tomará os datos, fará control de alcoholemia e, no caso dunha suposta detención, poñerá a disposición xudicial as persoas responsables do accidente.

O alumnado e o profesorado do CEIP Someso tamén participará nun simulacro de evacuación por lume no mesmo centro co obxectivo de trasladar as pautas de resposta ante unha situación de emerxencia. Finalmente, a xornada completarase cunha charla na que participarán representantes dos distintos servizos xunto á plataforma Stop Accidentes, que narrarán ao alumnado as súas experiencias nos accidentes de tráfico.