Pesar no xornalismo galego polo falecemento de Nacho Mirás

O xornalismo galego expresa o seu pesar polo falecemento de Nacho Mirás (Vigo, 1971), redactor de ‘La Voz de Galicia’ que morreu como consecuencia dun cancro contra o que loitou os últimos dous anos.

A través dun comunicado, o Colexio de Xornalistas expresou o seu pesar pola morte de Mirás, que narrou no seu blog Rabudo.com a súa loita contra a enfermidade. Coa súa ácida e atinada pluma, tamén levou a súa historia ao libro ‘O mellor peor momento da miña vida’.

Así mesmo, o Colexio de Xornalistas, ao pleno da cal pertenceu Mirás durante as dúas primeiras lexislaturas (2000-2004 e 2004-2008), trasladou “o cariño de toda a profesión” á familia e amigos, especialmente á súa muller, a tamén xornalista Ainhoa Apestegui, membro do pleno de goberno do colexio.

En sinal de respecto, suspendeuse a xunta de goberno do colexio prevista para este sábado, xornada na que terá lugar o funeral en memoria de Nacho Mirás, ás 12,00 horas, en Boisaca -en Santiago-.

PÉSAME DO ALCALDE DE SANTIAGO

Pola súa banda, o alcalde de Santiago, Martiño Noriega, comezou a súa rolda de prensa deste venres cun recordo ao xornalista falecido este xoves, do que eloxiou a súa valía persoal e profesional. Así mesmo, o rexedor compostelano deu o pésame á súa familia e amigos de parte de toda a corporación municipal.

Noriega sinalou que é un día “triste” para el persoalmente, xa que mantiña relación de amizade con este xornalista dende os tempos nos que Mirás vivía en Cacheiras (Teo), e o definiu como unha persoa “estupenda” e “digna de admirar”.