O Sergas comprométese a dialogar cos celadores do Chuvi en próximas datas

Os celadores do Complexo Hospitalario Universitario de Vigo (Chuvi) mantiveron este luns unha reunión informativa coa directora de recursos humanos do Servizo Galego de Saúde, quen se comprometeu con eles a que “nas próximas datas haberá un novo contacto”.

Así o comunicaron os celadores, que indicaron que este encontro se produciu “a petición do Conselleiro de Sanidade”, Jesús Vázquez Almuíña e nel trasladouselles que a esa próxima reunión espérase que asista o propio conselleiro “cunha proposta firme”.

A pesar diso, os celadores confirmaron que manteñen as concentracións que convocaron para este mércores, que terán lugar ás 12,00 horas no Hospital Meixoeiro e de 10,00 a 13,00 horas no Álvaro Cunqueiro. En ambos os casos as protestas serán nas consultas externas.

Tal e como indicaran estes traballadores, con estas mobilizacións reclaman “o cesamento inmediato” do persoal que realiza o Transporte Interno de Xestión Administrativa (TIGA), unhas tarefas que, defenden, corresponden ao colectivo de celadores.

As concentracións deste mércores coinciden coa finalización do prazo de sete días que os celadores deron ao conselleiro de Sanidade para que cumpra co seu compromiso de reunirse con eles. De non producirse este encontro, advertiron que volverán protagonizar un peche indefinido como o que viviron nas pasadas semanas e que durou 16 días.