O PSOE urxe unha xunta de portavoces da Deputación de Ourense para que Manuel Baltar dea explicacións sobre a denuncia

O Grupo Provincial Socialista anunciou a solicitude urxente dunha xunta de portavoces da Deputación de Ourense para que o presidente do ente, Manuel Baltar, dea explicacións sobre a denuncia dunha muller na Fiscalía contra el por ofrecerlle en 2010 “unha praza fixa” na institución provincial a cambio de sexo.

Nun comunicado, os socialistas xustifican o carácter urxente da petición “debido á gravidade dos feitos” dunha denuncia por suposto “nepotismo” e “acordo de intercambio de favores sexuais por un posto laboral”.

“De acordo co dereito que nos asiste, procedemos a solicitar unha xunta de portavoces de carácter urxente para que o presidente da Deputación, Manuel Baltar, teña a oportunidade de explicarse ante os representantes das forzas políticas, dada a gravidade dos supostos feitos denunciados e o prexuízo que estes supoñen para a imaxe da institución provincial”, explican.

O escrito de denuncia, publicado por ‘eldiario.es’, ten de data de entrada na Fiscalía o 13 de outubro, e nel, a muller, cuxa identidade preserva o xornal dixital, relata que traballou na Deputación de Ourense entre os anos 2003 e 2009, razón pola que “coñeceu” a Manuel e José Luis Baltar.

A denunciante afirma que Manuel Baltar prometeulle “unha praza fixa” se mantiña “relacións sexuais con el” e recoñece que accedeu a iso “ante a necesidade do posto”, aínda que o dirixente popular nunca chegaría a cumprir o seu “compromiso”.

Fronte a estas acusacións, o actual presidente do PP ourensán anunciou unha resposta xudicial e que buscará “a contundencia da lei”.