O PSOE avanza que as mocións do BNG non contarán co seu voto na Deputación de Lugo

O alcalde de Becerreá, o socialista Manuel Martínez, asegurou este martes que as mocións do BNG no pleno da Deputación de Lugo non contarán co seu respaldo, tras quedar fóra do goberno provincial por non aceptar os nacionalistas que asumise un cargo neste por unha imputación.

Así, no pleno deste martes os votos do PP e de Martínez rexeitaron unha moción do BNG, que apoiaban os seus socios socialistas no executivo provincial, pola que se pedía declarar a provincia como territorio libre de “touradas”.

Previamente noutra moción dos nacionalistas, na relativa á regularización catastral e revisión da ordenanza sobre o IBI, o rexedor de Becerreá ausentouse do pleno.

A resposta dos populares (12 deputados) foi aplaudir a Martínez, tras pedir a quenda de palabra, na moción sobre touradas, onde dirixíndose aos nacionalistas dixo: “Este grupo dende o 20 de xuño, ou esta seita ou como se dixo no último pleno, un grupo de yihadistas que condenan ás persoas ignorando a presunción de inocencia, dixeron onte que non querían o voto dun imputado.

“Eu non lles vou beber o cáliz de que conten co meu voto nas súas mocións e, por iso, anuncio que a partir de agora calquera proposta que traia o BNG, sen que sexa de interese xeral para a provincia, obviamente voume abster ou saír do pleno ou cando non estea de acordo votará en contra”, subliñou.

REPROCHES

Martínez tamén lanzou reproches para o seu grupo, con respecto á abolición das ‘touradas’, e recordoulles que na lexislatura pasada se abstiveran.

Con iso, provocou que non se aprobase declarar a Lugo libre das corridas de touros, nun debate onde o voceiro do PP, José Antonio García, recriminaba ao BNG que en Pontevedra se subvenciona a praza de touros e mesmo “hai concelleiros nacionalistas que van ás corridas”.

Ao respecto, o voceiro nacionalista na institución provincial, Xosé Ferreiro, alegou que é unha forma “de tortura de animais”.