O presidente da Xunta mantén que o Álvaro Cunqueiro é un gran hospital

BNG e AGE volveron a afear este mércores as “deficiencias” do Hospital Álvaro Cunqueiro (HAC) de Vigo ao presidente galego, Alberto Núñez Feijóo, relatando varias denuncias cidadás, mentres que o mandatario autonómico recoñeceu que “claro que hai incidencias” vinculadas a un “difícil traslado”, pero se reafirmou en que o centro vigués é “un gran hospital” e pediu os profesionais que non se deixen “manipular”.

Na sesión de control, o voceiro parlamentario do BNG, Francisco Jorquera, sinalou que o gasto en sanidade “crece un 4,4 por cento”, por debaixo da media”, mentres que “o custo da colaboración público privada” do centro vigués “increméntase nun douscentos por cento”. “O hospital ía custar 450 millóns de euros e agora vainos custar 1.350”, expuxo.

O parlamentario nacionalista esgrimiu que a Administración tivo que buscar os “recursos financeiros” á concesionaria e que, “o que ía ser un hospital público financiado con fondos privados, acabou sendo un hospital privado financiado con avais públicos e por enriba recortado”.

“Porque recortaron todo, camas, quirófanos (…), desapareceu o proxecto de hospital materno infantil e, por se fose pouco, os usuarios teñen que soportar a precariedade e abusos na prestación de servizos da concesionaria”, manifestou o nacionalista, quen aludiu, entre outras cuestións, a “pagamentos abusivos” pola alimentación ou o aparcamento, así como goteiras ou a falta de material “esencial”.

Jorquera ironizou con que os populares “defenden a sanidade pública pagando o triplo por entregar a xestión do hospital a unha empresa privada” e leu varias denuncias de particulares, antes de instar o presidente galego a “baixar ao mundo ao mundo real” porque “o que ía ser a súa grande obra, converteuse nunha grande estafa”. “Ninguén en tan pouco tempo fixo tanto dano á sanidade pública como vostede, sentenciou.

DEFENSA DO FINANCIAMENTO

Fronte a iso, Feijóo replicou que a Consellería de Sanidade é o departamento “que máis presuposto público incrementa” e advertiu ao deputado do BNG que “dicir que se cobra por alimentación no hospital é outra falsidade que ten no seu haber”. Tamén negou “recortes” e que se reduzan cuartos ou que falte seguridade nos quirófanos.

En canto ao sistema de financiamento do centro, insistiu en que o seu Goberno decidiu facer o hospital e que tiña “dúas fórmulas” para facelo, a emisión de débeda pública ou formular o pagamento aprazado, que foi “a autorizada” polo Goberno socialista en Madrid e a que se empregou finalmente.

Por outra banda, sinalou que “todos os hospitais públicos os paga o Sergas” e que, por iso, o HAC é “un hospital público como os demais”. “Negar que é un gran hospital, que ten unha superficie que triplica o hospital anterior, mellores unidades de radiodiagnosis ou máis espazo para quirófanos é non defender a sanidade pública, e nós a imos seguir defendendo”, aseverou.

Fronte ás críticas de que os quirófanos están “inservibles”, Feijóo remarcou que se fixeron 723 intervencións cirúrxicas neles. Tamén reivindicou o resto o resto de actividade asistencial, con 2.960 altas de hospitalización, 73.300 consultas e 12.837 urxencias atendidas no primeiro mes despois do “difícil” traslado do hospital.

“DÉIXENNOS INVERTER EN VIGO”

Convencido de que cuestionar a seguridade dos quirófanos é “unha grande irresponsabilidade”, Feijóo volveu admitir que hai incidencias, pero tamén recordou que houbo unhas 700 cando empezou a funcionar o novo hospital de Asturias, durante a etapa de goberno de PSOE e IU. Por iso, instou a “deixar traballar os profesionais” e “inverter” en Vigo.

De feito, sinalou que no próximo exercicio se inverterá en Vigo, no que respecta a asistencia sanitaria, 15 millóns de euros. Ademais, instalarase un punto de atención continuada (PAC) e faranse obras de mellora no Hospital Meixoeiro: “laboratorios, microbioloxía, radiofísica, consultas externas…”.

“E neste hospital novo, imos poñer dous quirófanos híbridos e un TAC intraoperatorio”, ha apostilar, para concluír que “non é xusto” o que a oposición fai co HAC nin cos “6.000 profesionais que traballan en Vigo”. “Alá vostede coa súa responsabilidade”, espetou a Jorquera.

“DECISIÓNS POLÍTICAS QUE MATAN”

Tamén a vicevoceira de AGE, Yolanda Díaz, relatou casos de denuncia sobre o novo hospital vigués e instou o presidente a atender un grupo de celadoras presentes na sesión de control para coñecer de primeira man a situación do centro. E é que, ao seu xuízo, a “frivolidade” coa que o presidente aborda “o caos” do seu “proxecto estrela” esixiría a súa “dimisión”.

Díaz instou o presidente a aclarar se destituíu á exconselleira Rocío Mosquera porque privatizou de menos ou de máis” e instou a aclarar “que pasa no hospital de Vigo coas probas do aspergillus secuestradas”, para engadir que algunhas denuncias de particulares sobre o hospital xeran “terror”. “O de fresar un cranio recorda a un conto de Edgar Allan Poe”, esgrimiu.

Para a parlamentaria, Feijóo non solo é o presidente “máis caro” da historia de Galicia pola débeda xerada senón tamén “o peor xestor”. Así, acusou os populares de “destruír a sanidade” e convertela “nun negocio”, antes de sinalar que se Feijóo consente esta situación é porque – supón- “vai a La Rosaleda cando está enfermo” ou cando atenden a familiares seus no hospital de Vigo, reciben “unhas condicións privilexiadas” ou se desprazan “a Fátima”.

“CLARO QUE TEMOS DEFICIENCIAS”

“O que dá medo é escoitala con carácter xeral e escoitala falar de sanidade, dá pánico”, replicou Feijóo, quen incidiu en que “desprestixia” a sanidade pública galega e respondeulle que destituíu a Mosquera no exercicio das competencias que lle confiren o Estatuto de Autonomía e a lei que regula as atribucións do presidente da Xunta.

Feijóo recordou que o voceiro de AGE, Xosé Manuel Beiras, non abordou este asunto no Debate sobre o Estado da Autonomía e preguntouse se agora Díaz o “desautoriza”. “Claro que entre o que pasa en IU e en Podemos, créome absolutamente todo”, remarcou, antes de insistir en que as deficiencias non se cinguen só ao HAC, senón que tamén vivíronse en Asturias hai un ano.

“Cun goberno progresista no que estaban PSOE e IU. Claro que agora IU non sabe onde está”, criticou, para insistir en que o traslado “claro que provoca deficiencias e incidencias, que hai que arranxar”, e sinalou que, precisamente por iso, o novo conselleiro do ramo, Jesús Vázquez Almuíña, acudiu ao hospital para falar cos profesionais e ver a situación do centro nada máis tomar posesión.

Neste escenario, pediu aos profesionais que sexan conscientes de que estas “deficiencias” se rexistraron noutros traslados como o asturiano e que non se deixen “manipular” como, suxeriu, tratan de facer os seus rivais políticos.