O PP de Vigo pide explicacións a Caballero tras amparar a actuación de exdirectivos de Novacaixagalicia

O grupo municipal do PP pediu ao alcalde de Vigo, Abel Caballero, que “dea explicacións” tras “amparar” a actuación dos exdirectivos de Novacaixagalicia con respecto ás súas prexubilacións millonarias, tras a sentenza da Audiencia Nacional que os condena a dous anos de prisión, a multas de 75.000 euros e a devolver as cantidades cobradas indebidamente.

A portavoz dos populares, Elena Muñoz, fixo estas consideracións tras facerse pública a sentenza da Audiencia Nacional, que condena a José Luís Pego, Julio Fernández Gayoso, Óscar Rodríguez Estrada, Gregorio Gorriarán e o avogado Ricardo Pradas, polos delitos de administración desleal en concurso cun de apropiación indebida.

Segundo a concelleira do PP, a sentenza “despexa moitas dúbidas a aqueles que aínda as tiñan”. “O tempo está a pór a cada un no seu sitio, e demostrando quen actuou con responsabilidade e quen non o fixo, quen denunciou esta situación, cuestionou a legalidade das indemnizacións millonarias e a súa ética, e quen as estivo amparando”, proclamou.

A ese respecto, Muñoz afirmou que “a quen as amparou, agora correspóndelle dar explicacións, e o alcalde de Vigo debe dar moitas explicacións aos vigueses e viguesas”.