O Partido Popular cre que a deriva de Besteiro arrastra á Deputación de Lugo

O voceiro do PPdeG, Miguel Tellado, considera que, na súa “deriva”, o secretario xeral do PSdeG, José Ramón Gómez Besteiro, “arrastra” á Deputación de Lugo e ao seu propio partido, onde asegurou que “o dan por amortizado”.

“No seu propio partido ao señor Besteiro, escoitabamos voces estes días, dano por amortizado”, relatou o voceiro dos populares galegos en rolda de prensa, xusto antes de engadir que, “a can fraco, todo é pulgas”.

Nesta mesma liña, Tellado fixo fincapé na “debilidade” do líder dos socialistas galegos, quen, ao seu xuízo, “non pasa polo seu mellor momento, nin no plano xudicial nin no político”. E é que sostén que a “capacidade para xerar conflitos” de Besteiro “parece infinita”.

Por iso, Tellado fixo un repaso polas catro provincias galegas: “En Lugo primeiro foi con Orozco, despois co señor Martínez, logo co señor Santín, despois outra vez co señor Martínez e agora, outra vez, co señor Santín, que abandona a dirección provincial do partido”, relatou, en referencia ao exalcalde de Lugo, ao alcalde de Becerreá e ao exsecretario provincial do PSOE lucense.

Deseguido, o voceiro dos populares referiuse ás provincias da Coruña e de Ourense: “Na Coruña primeiro foi co señor Caamaño, logo co señor Sacristán, agora coa señora Sestayo; en Ourense primeiro foi co señor Pachi Vázquez, logo o conflito foi con Laura Seara, agora novamente co señor Pachi Vázquez…”, subliñou, en referencia ao exsecretario provincial do PSOE coruñés, ao actual, á socialista ferrolana, ao exsecretario xeral do PSdeG e á deputada ourensana.

“NINGUNHA CAPACIDADE DE MANDO” EN PONTEVEDRA

E é que, remarcou, a “única provincia” onde o partido socialista “non ten problemas ou, polo menos, non saen na prensa” é Pontevedra. “Posiblemente, iso é así porque na provincia de Pontevedra Besteiro non ten ningunha capacidade de mando”, opinou.

A liña seguida, fixo fincapé en que, no PSdeG, “cada vez é menos xente” a que “apoia” o seu secretario xeral. “Dende logo, tampouco estou eu aquí para facelo a campaña aos que lle queren mover a cadeira ao señor Besteiro, nin dende Galicia, nin dende España, nin dende Europa”, indicou, para logo ironizar con que, se o líder dos socialistas galegos “non cambia” as súas actitudes políticas, “pouco” poden facer os populares galegos para “axudarlle a ser candidato” nas próximas eleccións autonómicas.

No que respecta á situación na Deputación lucense, Tellado lamentou que o acordo para levar adiante a moción de censura que desbancou da Presidencia á popular Elena Candia “tan só durase unha semana”. “O resultado é que, unha semana despois da moción de censura, a Deputación de Lugo xa ten un goberno en minoría”, agregou.

Por iso, o voceiro dos populares galegos solicitou a Besteiro que ofreza explicacións aos lucenses ante unha “nova besteirada”, termo que cualificou como “a capacidade de crear problemas onde non os había”.

“ACORDOS SECRETOS” ENTRE BESTEIRO E MARTÍNEZ

“Dicía o señor Martínez que o señor Besteiro o volvese enganar. Nós cremos que, o certo, é que o señor Besteiro volveu enganar a todos os veciños da provincia de Lugo” denunciou, xusto antes de esixir que o secretario xeral do PSdeG explique os “acordos secretos” aos que “chegara” co alcalde de Becerreá, Manuel Martínez, así como o motivo polo que “decidiu finalmente incumprilos”.

Nesta mesma liña, reprochou ao líder do PSdeG que “estea a xogar” co ente provincial lucense por “intereses persoais e partidistas” e, a este respecto, asegurou que ten “tanta responsabilidade” Besteiro como o BNG.

“Ten que explicar como o BNG, con dous deputados nese goberno de coalición, ostenta a Vicepresidencia da Deputación e cinco áreas de goberno”, resaltou, para logo opinar que este feito “parece algo desproporcionado”.

CABALLERO, “EN REBELDÍA SEMPRE QUE PODE”

Ante preguntas dos xornalistas, Tellado tamén se referiu ás declaracións do alcalde de Vigo e presidente da Federación Española de Municipios e Provincias (FEMP), Abel Caballero, quen asegurou este xoves que non vai cumprir a Lei de racionalización e sostenibilidade da Administración local, coñecida como reforma local.

“O señor Abel Caballero parece que se declara en rebeldía sempre que pode e está en contra de todo”, opinou o voceiro dos populares galegos, quen considera que o tamén alcalde da cidade olívica asume a Presidencia dunha organización “moi importante” que “debe representar a todos os concellos de España” que están adheridos a ela.

Por iso, pediulle que sexa “responsable” co mandato que asume: “Cando un asume a Presidencia dunha entidade debe representar non só aos que o votaron e apoiaron, senón a todos os que representa e agrupa”, subliñou, para logo precisar que, dende o PPdeG, esperan que actúe con “responsabilidade”.