O Partido Popular considera repugnante que se poida ofrecer traballo a cambio de sexo e aconsella a Baltar dar a súa versión

O portavoz do Grupo Popular no Congreso, Rafael Hernando, considera “repugnante” que un cargo público ofreza traballo a cambio de manter relacións sexuais e aconsellou ao presidente da Deputación de Ourense, José Manuel Baltar, a quen unha muller acusa de tales prácticas, que contraste a denuncia e dea a súa versión.

Segundo publica ‘eldiario.es’, a denunciante asegura que Baltar, do PP, ofreceulle un posto fixo na Deputación a cambio de favores sexuais e asegura ter mensaxes telefónicas que o proban. O dirixente ourensán do PP anunciou accións legais.

Preguntado por este episodio en rolda de prensa no Congreso, o dirixente do PP dixo descoñecer o caso pero remarcou que, se a acusación é verdade, parécelle “repugnante”. En todo caso, cre que Baltar Blanco debe “contrastar a noticia e dar a súa versión”.