O Grupo Mixto pide o rescate da concesión de obra e servizos do novo hospital de Vigo

O Grupo Mixto reivindica no marco das súas propostas de resolución que se proceda ao “rescate inmediato” da concesión de obra e servizos do Hospital Álvaro Cunqueiro polas “deficiencias estruturais e funcionais” para terminar “coa discriminación da área sanitaria” viguesa.

Nas súas propostas de resolución, ademais aposta por “dignificar” aos que “perseveraron durante anos na súa loita contra o golpe de estado franquista” e se lles de “recoñecemento como loitadores pola democracia retirándolles a denominación actual que os considera delincuentes comúns ou bandoleiros”.

Como o resto das formacións da oposición, o Grupo Mixto tamén inclúe unha proposta de resolución relativa á lingua galega, na que aposta por que a Xunta “adopte todas as medias necesarias para garantir o uso normal e oficial do galego, potenciando o emprego da lingua galega en todos os planos da vida pública, cultural e informativa”.

Así mesmo, como o resto de grupos defende a derrogación do decreto do plurilingüismo e para dar cumprimento ao que solicita avoga por que se establezan “mecanismos de participación efectiva e eficaz que posibiliten este pacto e que aseguren as achegas de todos os sectores, desde os tecnicamente máis preparados como os que representen un campo de actuación determinante polas implicacións inmediatas e/ou futuras que teñen as súas actitudes lingüísticas”.

Entre outras, as 40 propostas de resolución do Grupo Mixto defenden o mercado de traballo; piden máis orzamento para educación, dependencia e sanidade; aspectos como que a baixa de maternidade increméntese a un mínimo de seis meses; que se recoñeza o termo feminicidio; un “plan estratéxico de futuro” para o sector lácteo e outras cuestións relacionadas co saneamento das rías galegas, a prevención de incendios forestais e o “acceso a unha vivenda digna”.