O Fútbol Club Meigas colabora na campaña de recollida de alimentos do Concello de Ames

O Fútbol Club Meigas organizou para este luns, 2 de novembro, un acto deportivo no que ademais de ver as rapazas deste club amesá xogar contra o Santiago Fútsal se poderá colaborar na campaña de recollida de alimentos posta en marcha polo Concello de Ames. Esta iniciativa, que comezará ás 10:00 horas, desenvolverase no pavillón polideportivo de Bertamiráns.

Ao longo da mañá do luns 2 de novembro haberá tres partidos de fútbol sala entre as rapazas do Fútbol Club Meigas e os integrantes do Santiago Fútsal. Ás 10:00 horas xogarán as rapazas benxamín do FC Meigas contra os rapaces desta mesma categoría do Santiago Fútsal. Unha hora máis tarde será a quenda das rapazas infantís do Meigas que disputarán un partido contra os rapaces desta mesma categoría do Santiago Fútsal.

O acto principal terá lugar ás 12:00 horas cun partido entre as rapazas da categoría sénior do FC Meigas e o equipo feminino do Santiago Fútsal. Ademais, o adestrador do equipo masculino do Santiago Fútsal, Santiago Valladares, e algún dos xogadores do primeiro equipo deste club tamén estarán en Bertamiráns para participar nesta iniciativa.

Por outra banda, haberá unhas caixas no pavillón polideportivo de Bertamiráns para colaborar coa campaña de recollida de alimentos que puxo en marcha o Concello de Ames.

Esta campaña denominada “Ames, concello solidario” desenvolverase de xeito ilimitado no tempo, coa recepción en diferentes establecementos comerciais do concello de alimentos non perecedoiros como aceite, tomate frito, leite, conservas, galletas ou cereais. Neste caso o FC Meigas faranse cargo da recepción dos alimentos, e posteriormente, o Concello encargarase de recollelos a vindeira semana no pavillón de Bertamiráns.