O domingo ábrese oficialmente a tempada de atletismo

A Sociedade Ximnástica atópase inmersa estes días na preparación da próxima tempada, que xa está encima. Os atletas levan varias semanas adestrando para afrontar as próximas competicións e nestes días están a acabarse de perfilar os equipos absolutos da entidade pontevedresa, co peche, o sábado, do período de fichaxes.

A Federación aínda non terminou de elaborar o calendario de competicións, como sempre será durante o mes de novembro cando conclúa case na súa totalidade o proceso de designación de sedes e datas pendentes, a expensa da aprobación definitiva pola Asemblea Xeral.

Polo momento novembro está infestado de carreiras populares, con tres citas importantes, a carreira de Negreira o 8 de novembro e o 15 a de San Martiño de Ourense, sen esquecernos de Vigo +11, que desgraciadamente coincidirá con Negreira. Aínda que haberá que estar atentos ao comezo do campo a través a nivel nacional, o 15 de novembro toca Atapuerca, con presenza o ano pasado de atletas pontevedreses, o 22 a Espada Toledana en Toledo e o 29 o cros da Constitución de Alcobendas; mentres que en Galicia teremos o Guillelme Brown en Pereiro de Aguiar o 21, preludio do Belarmino Alonso en Vigo, o día 29.

Será en decembro cando se verán timidamente as primeiras probas de atletismo en pista, para chegar ao novo ano, cun xaneiro infestado de atletismo baixo teito.