O conselleiro de Sanidade espera que a folga do Chuvi sexa a última

O conselleiro de Sanidade da Xunta de Galicia, Jesús Vázquez Almuíña, manifestou este martes a súa “intención” de que a folga de 24 horas convocada pola Xunta de Persoal no Chuvi “sexa a última folga que poida haber en Sanidade”, e reiterou a súa disposición a “solucionar problemas e falar”.

En declaracións aos medios tras o acto de toma de posesión de Ignacio López-Chaves como delegado da Xunta en Vigo, o conselleiro de Sanidade confirmou que manterá o contacto cos traballadores do complexo hospitalario vigués, xa que “o máis importante neste momento é o diálogo e facer un gran proxecto”, en alusión ao novo hospital Álvaro Cunqueiro (HAC). “E entre todos ímolo a conseguir”, engadiu.

Vázquez Almuíña admitiu que “hai cousas que evidentemente hai que mellorar”, aínda que inscribiu ditas cuestións no “traslado complexísimo” que supuxo a apertura do HAC. “Hai correccións que hai que facer, pero estamos nesa liña”, abundou, á vez que destacou que “todos os traballadores teñen moitas ganas de que isto salga ben”.

Sobre posibles medidas para solucionar as deficiencias que denuncia a Xunta de Persoal, o conselleiro confirmou que haberá iniciativas a curto, medio e longo prazo”, aínda que evitou concretar en que consistirán.

“En próximos días ímolas a facer públicas”, engadiu, e apuntou que o seu departamento está implicado “na mellora de todo”, especialmente naquilo que ten relación coa atención sanitaria, pero tamén noutras cuestións, como a mellora da sinalización de acceso ao HAC desde a autoestrada. “Todos os aspectos preocúpannos, e queremos axudar a darlles solución”, afirmou, e pediu colaboración a “outras administracións”.

RUEDA

Pola súa banda, o vicepresidente galego, Alfonso Rueda, tamén se referiu á folga convocada polos traballadores do Chuvi, e mostrou o seu “total respecto”, “mentres se desenvolva por canles pacíficas”.

Rueda apuntou, en todo caso, que “conforme pasan os días”, está “a demostrarse” que o novo hospital de Vigo é un centro “público” e está “a funcionar de maneira adecuada”, aínda que “coas lóxicas dificultades de arranque toda gran instalación”.

O vicepresidente da Xunta pediu a “colaboración de todos” na posta en marcha do Álvaro Cunqueiro, que xa está “a funcionar a pleno rendemento”, e que “non haxa demagoxias”, para que se deixe traballar aos profesionais e á Xunta”.