O Colexio de Médicos da Coruña considera acertada a decisión sobre Andrea

O presidente da Comisión de Ética e Deontoloxía do Colexio de Médicos da Coruña, Fernando Márquez, manifestou este martes que ve “acertada” a decisión do equipo médico do Complexo Hospitalario Universitario de Santiago (CHUS) de retirar a alimentación artificial a Andrea, a menor de 12 anos que padece unha enfermidade neurodegenerativa irreversible, ao tempo que reivindicou unha “vía de arbitraxe profesional vinculante” para casos similares.

En declaracións, Márquez valorou que a decisión de retirar a alimentación artificial a Andrea vai “en beneficio da paciente, que é o principal” para non prolongar unha situación “innecesaria”.

Non obstante, recoñeceu que “fose desexable que chegase antes” este acordo do equipo médico cos pais da nena, despois dos proxenitores reclamasen unha morte digna para a súa filla de doce anos. “É unha gran noticia para a pequena”, abundou.

Ao respecto do caso desta familia de Noia (A Coruña) tras o “cambio de criterio” do equipo médico do Complexo Hospitalario de Santiago (CHUS) polo “empeoramento” da nena, o doutor Márquez manifestou que “abre unha vía de reflexión e toma de decisións”.

NORMATIVA

“Temos unha normativa máis que suficiente”, sostivo preguntado pola lei galega, pero puntualizou que sería necesaria unha “vía de arbitraxe profesional vinculante” no ámbito sanitario para abordar estes casos de morte digna.

Por iso, subliñou que “hai que creala” e defendeu que os colexios médicos “están en condicións de facelo”. “Paga a pena facelo”, abundou en relación á posta en marcha dunha vía de arbitraxe profesional vinculante, que contase cun “equipo interprofesional” integrado por médicos e profesionais do ámbito xurídico.

Neste sentido, explicou que ante os “matices” avoga por “en cada caso valorar a situación”. “A normativa é suficientemente boa”, precisou, ao tempo que apostou por “intentar que as cousas vaian mellor”.