O Colexio de Enfermaría súmase as críticas polas deficiencias do HAC

O Colexio Oficial de Enfermaría da provincia de Pontevedra sumouse este xoves ás críticas doutros colectivos sobre as “deficiencias” no Hospital Álvaro Cunqueiro de Vigo, e advertiron de que o servizo de Urxencias do novo centro “é un caos”. Nunha rolda de prensa celebrada este xoves, o avogado do Colexio, Javier Pérez, explicou que a xerencia do Chuvi xa recibiu un escrito no que se enumeran multitude de incidencias relacionadas coas Urxencias, e que non foi respondido.

Por iso, volverase remitir outro comunicado á xerencia, no que se incluirán novos problemas xurdidos neste servizo, pero irase máis alá e acudirase á Inspección de Traballo por cuestións que poden afectar á seguridade laboral do equipo.

Do mesmo modo, porán estas incidencias en coñecemento da Fiscalía, por se houbese “un suposto penal”, é dicir, por se as circunstancias do servizo provocasen un delito de omisión do deber de socorro, ou puxese “en risco” a integridade física e a vida das persoas.

Na relación de incidencias recollidas polo Colexio, destacan sobre todo os problemas derivados da escaseza de medios técnicos e humanos, que provocan longas esperas, descoordinación nas actuacións, impaciencia de familiares (que chegaron a provocar algún ‘motín’), falta de camas, de medicación ou problemas coas axudas de custo dos pacientes (ceas que chegan ás 23.00 horas ou que non chegan, comidas que chegan ás 16.30 horas, etc).

TESTEMUÑOS

Na rolda de prensa deste xoves deron o seu testemuño dúas enfermeiras que exercen o seu labor no servizo de Urxencias, e insistiron varias veces que “o caos e a improvisación son continuos”, xa que o persoal é insuficiente e “non existen protocolos e circuítos claros” para atender os pacientes e actuar “como un equipo”. “Organizaron o traballo como na cadea de Citroën, e iso aquí non funciona. Hai que dar atención personalizada”, se lamentou unha destas profesionais.

Outras das deficiencias denunciadas son aquelas que afectan á propia estrutura do servizo. A ese respecto, as enfermeiras explicaron que os espazos non son adecuados, que as distancias son moi longas e que “cada perda de minutos pode custar vidas”. “A distancia a raios é enorme, mesmo perdemos pacientes e historiais, chamámoslle o burato negro, abundou unha enfermeira.

Estas profesionais tamén criticaron que, a pesar das comunicacións advertindo sobre estes problemas, os seus “superiores” non fixeron “nada”, e “nin sequera se preocuparon de que o equipo teña formación axeitada”, a pesar de que se unificaron equipos de dous hospitais distintos.

“Alguén ten que dar a cara, eu xa a dou diante dos pacientes”, explicou unha das traballadoras, quen afirmou que, outro dos problemas é que “a concesionaria non permite” que se instale material procedente dos antigos hospitais, nin que haxa “xente nos corredores”.