O Auditorio acollerá a Gala Benéfica de Cruz Vermella en favor da recollida de fondos para Promoción do Éxito Escolar en Ourense

O Auditorio acolle esta fin de semana a Gala Benéfica organizada por Cruz Vermella en favor da recollida de fondos para Promoción do Éxito Escolar en Ourense. Baixo o lema “Que non pare a cultura”, o sábado e o domingo a partir das 20 h actuarán na sala principal do Auditorio os grupos “Etiqueta Negra”, “La Sombra”, “Swiss Cottage”, “Amizade”, “Auriam Heep” e “Los Camachuelos”. As entradas teñen un prezo de 2 € e os beneficios recadados irán destinados ao programa desenvolvido pola Cruz Vermella de Ourense que traballa na promoción do éxito escolar.

Na presentación desta mañá estivo a Concelleira de Cultura, Belén Iglesias, a representante da Cruz Vermella, Carmen González e Javier Vaz, organizador do festival. A concellería de Cultura cede o Auditorio Municipal para esta actividade que en palabras de Belén Iglesias “é tan importante e tan necesaria na nosa sociedade hoxe en día”.