O alcalde de Lalín cre que os políticos de toda a vida como Beiras xa non valen

O alcalde de Lalín, Rafa Cuiña, tamén membro da executiva de Compromiso por Galicia (CxG), abordou este mércores o proceso de confluencia da esquerda galega de cara ás eleccións xerais para lamentar que determinadas persoas con “vicios adquiridos dende hai moitos anos” están a poñer “demasiadas rochas no camiño”. Neste sentido, xulgou que “os actores de toda a vida do nacionalismo, do galeguismo”, como Xosé Manuel Beiras ou Paco Rodríguez, “xa non valen”; ao tempo que augurou que a unidade non será posible e que se presentarán dúas listas, de modo que será “un fracaso”.

Nunha entrevista concedida á Radio Galega, o rexedor lalinense afondou en que tanto Beiras como o histórico líder da UPG “son xente que, intelectualmente, non hai debate sobre eles”, pero afeoulles que “nunca xestionaron recursos públicos” senón que “sempre estiveron felices na trincheira, debatendo sobre cuestións por enriba do ben e do mal”. “Simplemente dedicáronse á política de salón (…), pero o que é a realidade da xente non a contemplaron”, abundou, antes de comentar que a el le “aburren” este tipo de debates.

Fronte a iso, despois que en días pasados advertise de que sairía da dirección de CxG en caso de que a militancia opte por avalar unha candidatura que non sexa netamente galega, Rafa Cuiña fixo fincapé en que “os seus principios” lle levan a reivindicar que Galicia poida “defender os seus intereses” a través dun grupo parlamentario propio nas Cortes Xerais. Máxime, proseguiu, á vista do “proceso constituínte que parece que se vai abrir na próxima lexislatura” e do que a comunidade non pode seguir “á marxe”, e menos por “unha cuestión de egos”.

Así as cousas, pedida a súa opinión sobre como finalizará o proceso de confluencia, expresou a súa opinión de que non cristalizará unha candidatura única. “Creo que estamos condenados a que haxa dúas listas e que isto é un fracaso. En vez de ter unha posibilidade real de éxito, teremos dous fracasos”, prognosticou, sen deixar de observar como “os partidos tradicionais, que están nun dos peores momentos da súa historia”, están “encantados” con este tipo de manobras “lamentables”. “A min dáme vergoña todo isto”, recoñeceu, sen deixar de insistir en que Galicia require un grupo propio no Congreso que defenda os seus intereses.

Con todo, apelou a seguir facendo “esforzos” para que “unha lista unitaria sexa posible” e que non aconteza como nas últimas eleccións galegas: que “un grupo de partidos” se puxeron de acordo -en alusión a Anova e Esquerda Unida- e despois dedicáronse a “deixar mal os que non se adheriron ao que eles decidiron”.

“UNHA NOVA XERACIÓN DE GALEGUISTAS”

Ao fío diso, lamentou que Encontro por unha Marea Galega, unha das plataformas en favor da confluencia, apostara por “partidos do espazo AGE”, como Ecosocialistas e Equo malia o seu reducido tamaño e presenza, e, en cambio, “vetara” ao encontro da semana pasada a Terra Galega, que conta con “alcaldes en vilas importantes”, porque “os acusan de ser de dereitas”.

“É un debate vello e canso, e non me estraña que a xente estea cansa de escoitar tanta parvada aos actores de sempre”, remarcou un dos membros da coordinadora da outra plataforma, Iniciativa pola Unión, quen volveu poñer de manifesto que “ten que entrar unha nova xeración de galeguistas” na escena política “porque os que estiveron ata agora non valen”.