Máis de 4.000 persoas chegan a bordo do ‘Celebrity Eclipse’ ao porto de Vigo

Máis de 4.000 persoas, entre pasaxeiros e tripulantes, chegaron esta mañá ao Porto de Vigo a bordo do ‘Celebrity Eclipse’, que recalou na dársena viguesa sobre as 08.30 horas procedente de Southampton (Gran Bretaña).

Durante a súa estancia en Vigo, o buque, pertencente á naviera Celebrity Cruises, trouxo a bordo un total de 2.887 pasaxeiros, ademais de 1.279 tripulantes. Está previsto que sobre as 16.00 horas de hoxe continúe coa súa viaxe rumbo a Lisboa (Portugal). 

Con 315 metros de eslora e 37 de manga, o ‘Celebrity Eclipse’ foi inaugurado en abril de 2010. Pertence á Clase Solstice e destaca especialmente polos seus camarotes AquaClass, ao incorporar elementos de spa especiais nos camarotes, ademais de ofrecer acceso exclusivo aos servizos de spa e asentos asignados no restaurante Blu. 

Así mesmo, o ‘Celebrity Eclipse’ conta, como gran novidade en alta mar, con The Lawn Club, unha cuberta superior con vistas ao mar con 2.000m2 de céspede natural. 

En canto á restauración a bordo, o buque de Celebrity Cruises dispón de dez restaurantes exclusivos para calquera ocasión, incluídos catro restaurantes de especialidades como Qsine (cociña internacional cun enfoque informal e moderno), Tuscan Grille (asador italiano), Murano (cociña europea contemporánea) e Blu (cociña sa).