Enviar a un amigo
Opinar
ImprimirFeijóo agradece aos profesionais do Sergas o seu labor co paciente con sospeita de ébola
O presidente da Xunta, Alberto Núñez Feijóo, aproveitou a sesión de control deste mércores para agradecer o seu labor aos profesionais do Servizo Galego de Saúde (Sergas) que se encargaron de atender ao paciente con sospeita de ébola que foi trasladado ao Hospital Meixoeiro de Vigo.
En concreto, o departamento de Saúde Pública do Sergas activou o protocolo do ébola tras o ingreso este martes, no Complexo Hospitalario Universitario A Coruña (Chuac) dun home, natural de Guinea, que presentaba dende hai varios días febre. Ante a posible sospeita de que se tratase dun caso de ébola, solicitáronse os medios anticontaminación e tomáronse as mostras para confirmar ou descartar se se trata do virus.
Segundo un comunicado difundido pola Consellería de Sanidade, as mostras tomadas foron enviadas para a súa análise ao Centro Nacional de Microbioloxía en Madrid e é previsible que os resultados estean “nas próximas horas”.
Pola súa banda, o paciente foi trasladado, a primeira hora da mañá deste mércores, nun dispositivo especial do 061 ao centro de referencia para casos sospeitosos de ébola, no Hospital Meixoeiro de Vigo. De confirmarse a presenza do virus, será derivado a un dos hospitais que se fixaron no Consello Interterritorial do Sistema Nacional de Saúde como unidade de referencia para o tratamento de casos confirmados.
Ante esta situación e no marco dunha pregunta do BNG cargada de críticas en relación ao Hospital Álvaro Cunqueiro (HAC) de Vigo, Feijóo aproveitou para dar as grazas “a todos os profesionais do Sergas polo que fan” e referiuse, en concreto, aos encargados de atender o paciente con sospeita de ébola.
“DE ACORDO COS PROTOCOLOS”
Feijóo explicou que este martes entrou en Urxencias do Chuac este paciente e que neste hospital “se estivo a traballar toda a noite”, antes de que o home fose trasladado ao centro sanitario vigués. Preocupado polos “problemas sanitarios” que poidan rexistrarse en Galicia, deu as grazas a todos os profesionais sanitarios que interveñen na súa atención.
Así, mencionou aos profesionais dos hospitais da Coruña e Vigo implicados, así como ao 061, que se encargou de trasladar o paciente “de acordo cos protocolos previstos”.
