Comisan 94 quilos de ameixa nun operativo en Ferrol

Axentes do Servizo de Gardacostas, en colaboración con axentes da Policía Autonómica, realizaron hoxe un operativo contra o furtivismo nas zonas de Caranza, O Baño, Malata, A Barca e As Pías, na ría de Ferrol, que se saldou co comiso de 94 quilos de ameixa e coa identificación de 6 persoas que estaban faenando ilegalmente.

Nesta actuación os axentes requisaron máis de 82 quilos de ameixa babosa, máis de 11 quilos de ameixa xapónica (cun prezo estimado no mercado que superaría os 1.100 euros) e 3 pranchas de porexpán.

A Consellería do Medio Rural e do Mar lembra á cidadanía que o consumo de marisco extraído e comercializado de xeito ilegal pode supor un risco para a saúde ao non ter pasado ningún tipo de control que o avale. Por iso pide ao consumidor que non compre produto fóra das vías legais de comercialización.