Centos de persoas despiden á última vítima da violencia machista en Pontesampaio
A igrexa de Pontesampaio, en Pontevedra, quedouse pequena para acoller aos centos de persoas que, non só desta parroquia, senón tamén desde as localidades lindantes de Soutomaior e Redondela, acompañaron á familia de Concepción Reguera Peón, de 38 anos, no funeral por quen foi a quinta vítima da violencia machista en Galicia no que vai de ano.
Tan numerosa foi a afluencia de público que até o atrio do templo encheuse de veciños; entre eles atopábanse o alcalde de Pontevedra, Miguel Anxo Fernández Lores, a concelleira de Igualdade, Carme Fouces, e os concelleiros de Facenda, Raimundo González, e Accesibilidade, Luis Bará, estes últimos con vinculación e raíces familiares nesta parroquia pontevedresa.
Ao termo do funeral, o presidente da Asociación de Veciños Heroes de Pontesampaio, Ramón Agulla, destacou a “resposta contundente” por parte da cidadanía na concentración de repulsa polo crime e en solidariedade coa vítima e os seus achegados, que se celebrou este pasado domingo ante a vivenda da muller asasinada.
Así mesmo, varios veciños lamentaron que este suceso, do que non hai ningún precedente na parroquia, é unha “traxedia” e unha “desgraza moi grande” para Pontesampaio.