Caixas, carpetas e bolsas, intervidas nun rexistro en Vigo na Operación Jaro

A Guardia Civil levou caixas de cartón, carpetas e bolsas con papeis dun rexistro efectuado este venres en Vigo no marco da ‘Operación Jaro’ na que foron detidas nove persoas en Galicia, entre elas catro na cidade olívica, nun operativo contra o ámbito de Resistencia Galega por enaltecimiento do terrorismo.

A primeira hora da mañá deste venres axentes coa cara tapada e armados acudiron ao número 1 da rúa Nicaragua para efectuar, ante a expectación de veciños, un rexistro no domicilio dun dos detidos.

Ao lugar acudiron varios vehículos da Guardia Civil e axentes, que custodiaron a entrada do edificio ata concluír o rexistro sobre as 11,45 horas. Os gardas levaron caixas e bolsas da vivenda.

Á saída do edificio dos axentes cun detido, unha parella berrou “defender a terra non é delito”, ao tempo que proferían berros de “ánimo”.

OPERATIVO

Na ‘Operación Jaro’ practicáronse este venres nove detencións nas localidades de Santiago de Compostela (1), Boiro (1), Muros (1), Pontevedra (2) e Vigo (4).

Ademais, os axentes da Guardia Civil procederon a practicar dez entradas e rexistros ordenados pola Audiencia Nacional. Nove deles nos domicilios de sete dos detidos, e un máis no local utilizado habitualmente pola organización.

O Ministerio de Interior considera que os nove detidos en Galicia no marco desta ‘Operación Jaro’ contra a armazón de Resistencia Galega “desenvolveron un papel activo” coa realización de diversos actos de enaltecimiento do terrorismo.

O operativo desenvólveno axentes da Guardia Civil, en coordinación coa Fiscalía e baixo a dirección do Xulgado Central de Instrución en funcións de garda da Audiencia Nacional.