Banco de Alimentos busca 1.500 voluntarios para a Gran Recollida Solidaria en Pontevedra

A Fundación Provincial Banco de Alimentos de Vigo busca 1.500 voluntarios que participen na terceira edición da Gran Recollida Solidaria 2015 na provincia de Pontevedra, que se desenvolverá os días 27 e 28 de novembro e na que aspiran a superar os 265.000 quilos de alimentos recolleitos.

Nunha rolda de prensa este luns, o presidente a entidade, Pedro Pereira, animou á cidadanía a vivir esta experiencia “enriquecedora e comprometida coas persoas que peor o están pasando na actualidade”, para o que os interesados poden entrar na web do banco de alimentos, enviar un correo a info@bancoalimentosvigo.org ou chamar ao 986.263.022.

Segundo trasladou, aínda que se fala de “recuperación”, “o día a día de moitas familias continúa sendo complicado” e, de feito, asegurou que os quilos de comida entregados polo Banco de Alimentos “non só non diminuíron senón que aumentaron”. A fundación axuda a unhas 150 ONGs e colectivos da provincia de Pontevedra e chega a unhas 25.000 persoas en dificultades.

Na iniciativa participarán este ano máis de 130 hipermercados e supermercados de Vigo, Pontevedra, Val Miñor, Baixo Miño, Sanxenxo, Vilagarcía, Marín, Ponteareas e Lalín, a partir dos que esperan superar os 265.000 quilos de alimentos e aspiran a incrementar a cantidade para “chegar máis aló da primavera” entregando alimentos.

A imaxe da campaña de recollida de alimentos deste ano -en 2013 foi Borja Oubiña e en 2014 Luis Tosar- presentarase publicamente o próximo 9 de novembro, aínda que a fundación adiantou que será “un rostro moi coñecido”.