Ames asina os contratos do servizo de mantemento e reparación dos ascensores municipais

Sinatura do contrato con Orona

O alcalde de Ames, José Miñones, vén de asinar coa empresa Orona Sociedad Cooperativa o contrato relativo ao servizo de mantemento e reparación dos ascensores, montacargas e plataformas salvaescaleiras instalados nas dependencias municipais e edificios auxiliares. Ademais, asinouse coa empresa Generali España SA o contrato privado do servizo de seguros de accidentes colectivos do Concello de Ames. O prezo destes dous contratos ascende ao importe de 21.550 euros.

Deste xeito, os traballos de mantemento e reparación dos ascensores, montacargas e plataformas salvaescaleiras instalados nas dependencias municipais e edificios auxiliares vainos a executar a empresa Orona Sociedad Cooperativa. Ata o de agora o mantemento dos ascensores víñase prestando polas propias empresas instaladoras, sendo así varias as empresas que estaban facturando pola prestación deste servizo. Para o adecuado mantemento destes aparatos, e de cara a obtención dun mellor prezo, o Concello sacou a concurso a prestación deste servizo.

Este servizo deberá prestarse nos ascensores do CEIP de Barouta, da Casa do Concello, do CEIP Agro do Muíño, do CEP de Ventín, das Casas da Cultura de Bertamiráns e do Milladoiro, do CEIP da Maía, así como no aparato montacargas do CEIP da Maía e na plataforma salvaescaleiras do Centro de formación ocupacional de Aldea Nova. A duración deste contrato comezou o pasado 1 de outubro e estenderase ata o 30 de setembro de 2017, non admitíndose prórrogas. O prezo pola totalidade do contrato ascende a 14.979 euros. 

Contratación do servizo de seguros de accidentes

Por outra banda, asinouse coa empresa Generali España SA o contrato privado do servizo de seguros de accidentes colectivos. Así, o Concello de Ames dispón dun servizo de seguros de accidentes colectivos para o seu persoal (empregados municipais -persoal laboral e funcionarios; concelleiros/as, persoal voluntario; profesorado e alumnado das escolas infantís municipais). 

Este contrato, que entrou en vigor o pasado 1 de outubro, terá unha duración inicial de dous anos, podendo prorrogarse de maneira expresa por períodos anuais ata un máximo de catro anos (incluído período inicial e prorrogas). O prezo deste contrato ascende ao importe de 6.571 euros.