Abel Caballero: o obxectivo do PSdeG é sacar sete deputados por Pontevedra

O alcalde de Vigo e presidente da agrupación socialista olívica, Abel Caballero, mostrou este luns a súa satisfacción pola candidatura do PSdeG da provincia ao Congreso dos Deputados e proclamou que o “obxectivo” é “sacar 7” nas próximas eleccións xerais de decembro.

A preguntas dos medios sobre a polémica en torno á configuración da lista por Ourense, Caballero rexeitou facer valoracións que non sexan sobre as candidaturas de Pontevedra. “En Pontevedra temos unhas listas estupendas”, recalcou, e engadiu que son “as mellores do mundo”.

Segundo Cabaleiro, as candidaturas ao Congreso e ao Senado (que encabezarán a independente Dolores Galovart e o deputado autonómico Abel Losada, respectivamente) “foron consensuadas”. Así mesmo, mostrou a súa “gran satisfacción” porque, asegurou, “Pedro Sánchez vai ser o seguinte presidente” do Goberno de España.

O alcalde olívico manifestouse convencido de que os candidatos por Pontevedra “o van facer moi ben”, e proclamou que o PSdeG aspira a obter 7 deputados pola provincia, é dicir, todos os que se elixen nesta circunscrición, e o que suporía máis do triplo da representación actual (dous deputados, Carmela Silva e Guillermo Meijón).