A Xunta promociona os produtos galegos do mar e da terra na feira Anuga de Alemaña

A Xunta promociona os produtos galegos do mar na feira Anuga, que se celebra do 10 ao 14 de outubro en Colonia, Alemaña. A Xunta de Galicia, a través das consellerías do Mar e do Medio Rural, estará presente na 33 edición desta feira bienal.

O pavillón galego contará cun stand de 150 m² que dará cabida ás 13 empresas galegas coexpositoras do sector alimentario, a maioría pertencentes á industria conserveira e con importante acceso ao mercado alemán. Ademais das 13 empresas coexpositoras, o stand da Xunta tamén contará cunha área destinada a centro de negocios, na que albergará a outras 8 empresas.

O director xeral de Pesca, Acuicultura e Innovación Tecnolóxica, Juan Maneiro, visitará esta feira o domingo e o luns e realizará un percorrido polas instalacións co obxectivo de difundir os produtos pesqueiros galegos, chegar a novos mercados e ampliar as súas posibilidades de negocio.

Anuga

A feira Anuga é o certame máis importante de Europa no campo da alimentación e das bebidas. Está dirixida a un público exclusivamente profesional e nela danse cita cadeas de supermercados, distribuidores do sector, tanto de venda ao maior como minoristas, ampliando as posibilidades de negocio tanto para as grandes empresas como para as pequenas.