A xunta de persoal cifra o seguimento da folga no CHUVI nun 90%

Paro de 24 horas no CHUVI

A xunta de persoal do Complexo Hospitalario Universitario de Vigo (CHUVI) avanzou que a participación no paro de 24 horas convocado para este martes é do 90%, con servizos que pararon “completamente” a súa actividade, como o laboratorio ou anatomía patolóxica. Polo momento, a Consellería de Sanidade non facilitou os seus datos sobre o seguimento desta protesta.

O presidente da xunta de persoal, Ángel Cameselle, subliñou que a folga “é un éxito” e instou ao conselleiro de Sanidade, Jesús Vázquez Alumuiña, a demostrar “vontade política” e pór solución “inmediata” a cuestións como o prezo do aparcadoiro, a falta de material para as intervencións ou a privatización dalgunhas actividades dos celadores.

Máis de 500 persoas concéntranse este martes no Hospital Álvaro Cunqueiro de Vigo, fronte ao despacho do xerente, Félix Rubial. Así, corearon consignas como “Dimisión de toda a dirección” ou “Isto é un hospital, non un centro comercial”.