Á venda as entradas para o primeiro partido de liga do Rio Natura Monbus Obradoiro

O Rio Natura Monbus empeza a tempada este domingo 11 ás 13.00 horas en Sar ante o Baloncesto Sevilla, partido para o que xa ten á venda as súas entradas. Ademais, o Consello de Administración do club decidiu que por cada entrada vendida neste primeiro partido de liga, destinarase 1 euro á recadación de fondos realizada polo ex xogador do club Levon Kendall para custear o tratamento médico do seu fillo.

O prezo xeral dos pases será de 19 euros en Fondos, 25 en Tribunas 2, 29 en Tribunas 1 e 35 en Tribunas Retráctiles. Un ano máis, volverá haber prezos reducidos para menores de 18 anos, estudantes menores de 25, parados de longa duración (máis de 6 meses), federados do ámbito do baloncesto e maiores de 65 anos. En todos eses casos, o prezo quedará en 15 euros en Fondos, 19 en Tribunas 2 ou 25 euros en Tribunas 1.

As entradas pódense comprar desde xa mesmo mediante a páxina web do club (www.obradoirocab.com) ou en oficinas, de 10.00 a 14.00 e de 17.00 a 20.00 horas. 

Os Amigos da Fundación Heracles, pola súa banda, poderán xa escoller o encontro para retirar as dúas invitacións que lle corresponden nun do tres primeiros en Sar.