A Deputación de Lugo aproba de urxencia axudas a 31 concellos do Partido Popular

A Deputación de Lugo aprobou este martes, nunha xunta de goberno extraordinaria, subvencións por un importe de 2,9 millóns de euros para 33 concellos da provincia, dos que 31 están gobernados polo PP. En rolda de prensa, a presidenta provincial, Elena Candia, xustificou esta decisión na necesidade de “equilibrar” a inversión de PSOE e BNG á fronte desta institución, a dous días de que se debata a moción de censura contra ela.

E é que, como apuntou, entre “o 1 de xaneiro e o 23 de xuño”, municipios liderados por PSOE e BNG recibiron axudas por valor de 3,4 millóns de euros. Coas aprobadas este martes, proseguiu, os 67 concellos da provincia recibirán achegas conforme ás “necesidades” que “transmitiron” á Deputación.

Así, Candia detallou que a “maioría” dos investimentos van destinadas “a servizos básicos”, como saneamento, arranxo de camiños, algún proxecto cultural e infraestruturas básicas no medio rural, entre outras.

“Con iso, e se lle sumamos a cantidade económica que puxemos na anterior xunta de goberno, concluímos estes tres meses cun balance moi positivo na repartición de fondos públicos, pois todos os concellos desta provincia tiveron unha resposta ás súas necesidades na maioría dos casos económicas”, sentenciou Candia.