A Deputación da Coruña e a Federación de Empresarios de Barbanza impulsan un plan de formación turística

O deputado responsable da área de Promoción Económica e Emprego da Deputación da Coruña, José Luis García, e o presidente da Federación de Empresarios do Barbanza (FEB), José Ramón Romero García, asinaron esta mañá na sede da institución provincial o convenio para o financiamento do Plan de Formación Barbanza, destinado aos sectores turístico-hosteleiro e comercial da comarca.

Segundo estipula o texto do protocolo, a Deputación achegará 30.000 euros e a entidade empresarial 7.500 € para desenvolver na comarca accións formativas que se centrarán en catro eixes fundamentais: cómo atraer máis visitantes mediante a creación de produtos turísticos e marcas turísticas ben posicionadas, os novos factores que contribúen ao éxito da hostelería e do comercio local e a colaboración público-privada e intermunicipal como ferramenta de desenvolvemento turístico.

Segundo explicou José Luis García, os cursos irán destinados a aos profesionais, traballadores autónomos e pemes dos sectores turístico-hosteleiro e comercial dos concellos de Padrón, Rois, Dodro, Rianxo, Boiro, A Pobra do Caramiñal, Ribeira, Porto do Son, Lousame, Noia, Outes, Muros e Mazaricos, e beneficiaranse dos mesmos unhas 300 persoas en total.

“O obxectivo é contribuir á profesionalización destes sectores e facilitarlles novas ferramentas e estratexias que lles axuden ao crecemento do seu negocio e que contribúan así ao desenvolvemento económico da comarca e á xeración de emprego”, apuntou José Luis García.

Pola súa banda, o presidente da FEB, José Ramón Romero, agradeceu o apoio da institución provincial para o desenvolvemento do programa.