A auga da cidade de Ourense obtén a máxima certificación internacional

Ourense conta cunha das augas para consumo humano máis saudables de Galicia e de España segundo o acredita a certificación de calidade ISO 22.000 que recibiu o Concello da empresa TÜV Rheinland encargada de expedir este certificado internacional.

Esta certificación recoñece tanto a calidade da auga que se subministra á poboación, garantindo a súa salubridade de acordo cos criterios aplicables á industria alimentaria, como todo o proceso de produción da auga urbana (tratamento, almacenaxe e distribución) que ven levando a cabo Viaqua, a empresa xestora do abastecemento municipal de auga na cidade.

Para conseguir este recoñecemento a empresa concesionaria incorporou os sistemas e métodos de control máis eficaces coa finalidade de lograr a inocuidade da auga ao longo das diferentes etapas do abastecemento, desde a súa captación ata o subministro aos consumidores.

A responsable da empresa TÜV Rheinland, Almudena Bouza, entregou ao alcalde, Jesús Vázquez, a acreditación que avala a máxima calidade da auga para consumo humano, nun acto celebrado no salón de plenos do Concello, no que tamén estivo presente o Director de ViAQUA, Julio Masid Bande, e a xerente da empresa en Ourense, Ana Tejeiro Sandomingo, así como o concelleiro de Infraestruturas, José Araújo.

O alcalde de Ourense, Jesús Vázquez, calficou como unha excelente noticia “que se nos recoñeza a calidade da nosa auga, do noso ben máis prezado, é algo do que nos temos que sentir orgullosos. E dende aquí teño que dar as grazas á empresa concesionaria, Viaqua, que incorporou os sistemas e métodos de control máis eficaces co fin de garantir a calidade da auga ao longo das diferentes etapas do abastecemento: dende a súa captación ata o suministro aos consumidores, ás billas de cada fogar ourensán. Dende hoxe, Ourense pertence ao selecto clube de cidades galegas que contan con este recoñecemento de calidade, xunto a Pontevedra e Santiago de Compostela”.

ETAP de As Coiñás

O alcalde tamén anunciou que a Estación de Tratamento de Auga Potable (ETAP) de As Coiñás está comezando arrancar os equipos, realizando traballos de captación de auga do Miño e próximamente comenzará a suministrar auga potable.

“Lémbrolles que a Xunta de Goberno Local do 20 de agosto deste ano xa acordara por unanimidade o encargo á empresa Viaqua do mantemento e xestión desta ETAP (a entrega á empresa concesionaria formalizouse un mes despois, o 28 de setembro). Unha decisión deste goberno municipal que, ao realizarse en prazo, impediu que se materializase a posibilidade de ter que devolver a financiación europea coa que se realizaron estas obras”, explicou o alcalde.

Obras que supuxeron un investimento de 21,3 millóns de euros, onde se incluía a construcción da nova ETAP de As Coiñás, a nova captación da marxe dereita do Miño, 4 depósitos de regulación de auga potable, 2 estacións de bombeo e 7.250 metros de conduccións. Traballos todos estes deseñados para garantir o abastecemento, en cantidade e calidade, a toda a cidade de Ourense, reforzando a conexión do novo sistema de abastecemento de auga en alta coa rede de distribución existente.

Jesús Vázquez concluiu sinalando que “garantíndo a auga potable en cantidade e calidade, Ourense gaña en calidade de vida”.