A amiga que recolleu as cinzas de Asunta fíxoo tras contactar co avogado da nai

A amiga da familia que recolleu as cinzas de Asunta “a finais de outubro” de 2013 explicou este xoves, durante a súa declaración como testemuña nos xulgados de Santiago, que o fixo tras poñerse en contacto co avogado de Rosario Porto, José Luis Gutiérrez Aranguren, xa que a nai da nena e o seu exmarido, Alfonso Basterra, “estaban encarcerados”.

Ademais, definiu como “marabillosa” a relación de Porto con Asunta e dixo que tamén era “moi boa” co seu pai e co seu avó, do que afirmou non ter “noticia” e descoñecer se lle deixou bens á súa neta tras falecer.

Previamente compareceu como testemuña unha veciña da casa de Montouto, en Teo (A Coruña), onde os investigadores sitúan o crime da menor. Esta muller sinalou que ela só viu a Rosario Porto no seu vehículo o día dos feitos, aínda que estaba máis afastada que os seus pais do coche.