2naFronteira estrea Sons de Nós

SONS DE NÓS é unha homenaxe musical aos poetas das Irmandades da Fala e da Revista Nós.

-Gravado en Casa de tolos por Segundo Grandío no verán de 2015.

-Distribuído por Inquedanzas Sonoras.

-Músicos colaboradores: Pablo Rodríguez (guitarra española); Carmen Gallego (Nyckelharpa e violín); Segundo Grandío (contrabaixo); César Loureiro (zanfona); Paulo Nogueira (percusión) e Leandro Deltell (batería).

-Fotografía: Eduardo Irago.

-Produción: 2naFronteira produzioni -Estrea: venres 30 de outubro no Liceo de Ourense, ás 20:30.

Nacemento de Sons de Nós

A idea de facer un traballo con poemas da revista Nós xurde xa na estrea de Zapatiños para Díaz Castro (2014) en Ourense. A Asociación ProCentenario Nós 2020, presente no acto, mostrou o seu interese nas cancións que fixera o dúo con poemas de Otero Pedrayo e suxeriulles musicar poemas da revista Nós. Ese mesmo verán puxéronse mans á obra e descubriron unha forte afinidade ideolóxica e estética coa revista: cosmopolita pero fortemente arraigada na terra e na tradición e cunha forte vocación de poñer a cultura galega no mundo. Un ecelcticismo e variedade que non é para nada allea é estilo de 2naFronteira.

Poetas musicados no disco

No disco Sons de Nós non está só representada a cidade de Ourense. Os poetas das nosas letras musicados son varios como Eduardo Blanco Amor, Otero Pedrayo, Xosé Velo, Francisca Herrera, Bouza Brey e F.L.Bernárdez. Foron moitos os temas que, por falta de espazo, tiveron que quedar fóra deste disco, xa que co material recollido e traballo levado a cabo podería chegar a publicarse un doble CD. Maurizio e Carmen, os 2naFronteira, esperan poder recollelo nun segundo disco, baixo o nome de Nós, seguramente no 2020, ano especialmente simbólico porque nel se conmemora o centenario da revista.

Características do disco

Sons de Nós está cheo dunha enerxía alegre e vital, e tamén hai ao lado de temas que transmiten estes sentimentos, algunhas cancións máis suaves e sensuais. A intensidade do disco recae nunha canción particular cargada dunha grande emotividade ao estar interpretada “a cappella” por Carmen cun poema de Francisca Herrera, a única muller que colaborou con poemas na Revista Nós. A influenza da revista foi tan importante, que mesmo na gráfica e na fotografía se fai referencia aos anos 20 e a elementos gráficos propios da publicación.

Este é sen dúbida, o traballo máis maduro de 2naFronteira, moi libre e ecléctico nos seus estilos, como é xa habitual neste dúo: recoñécense influencias do jazz, populares galegas, do lied europeo… Un ecelecticismo que os fai ás veces difíciles de clasificar pero que os converte nunha das propostas máis interesantes e de calidade do panorama da música actual galega.

Futuros traballos

O dúo xa comezou a traballar nos proxectos do 2016: cancións con poemas de Pepe Velo, e Carmen está iniciando un traballo moi vencellado á memoria histórica e ao papel das mulleres na guerra, con numerosos colaboradores. Un traballo coral que quere dar protagonismo ás mulleres na Guerra Civil pero que, ao mesmo tempo, tamén quere ser universal.