Última xornada da fase de grupos do Eurobasket 2015 para os obradoiristas

Os xogadores do Rio Natura Monbus Obradoiro, Adam Waczynski e Artem Pustovyi, continuaron hoxe o seu periplo europeo con Polonia e Ucraína respectivamente, última xornada de grupos na que Polonia conseguiu o pase a oitavos mentres que Ucraína despediuse do Eurobasket 2015.

Os obradoiristas disputaron senllos partidos consecutivos onte e hoxe. Waczynski, no grupo A, mediuse na pasada xornada a Israel, non conseguindo a vitoria nesta ocasión (73-75). Os polacos, aínda que xa matematicamente clasificados, xogáronse hoxe o posto no grupo ante Finlandia, gañando 65-78 e de novo cunha gran actuación de Adam Waczynski, MVP do partido con 17 puntos, 4 rebotes e 3 asistencias. Deste xeito, convértense en terceiros de grupo de cara aos cruces de oitavos.

Pola súa banda, a Ucraína de Artem Pustovyi despediuse hoxe da competición perdendo ante Bélxica (71-79), a pesar da vitoria de onte ante Letonia (74-75) que lle permitiu seguir loitando até esta xornada. Así, o obradoirista Artem Pustovyi, sen minutos nesta ocasión, poderá unirse proximamente á pretemporada do equipo compostelán. 

Os compañeiros de equipo de ambos os internacionais continúan cos adestramentos de cara á preparación dos próximos encontros. Os primeiros terán lugar este fin de semana no I Torneo EncestaRías de Vilagarcía, o sábado ante o Movistar Estudantes (20.00 horas) e o venres ante o Herbalife Gran Canaria (19.00 horas). Todo o que queira asistir a esta ocasión única poderá comprar entradas a través de www.masterseniorleague.com ou nas clínicas VitalDent.