Suspéndese o xuízo contra o acusado de tocar unha menor durante unhas clases de guitarra

O xuízo contra un home acusado de facer tocamentos a unha menor cando impartía clases de guitarra nun local parroquial da igrexa de Santa Baia de Boiro, na Coruña, foi suspendido ata o próximo día 16 de outubro. A sesión, que comezou este venres nos xulgados de Santiago, quedou aprazada a petición da Fiscalía tras presentar o avogado da defensa, o letrado Francisco José Lago Calvo, dous novos informes que deben ser estudados polas partes.

En concreto, segundo explicou Francisco José Lago Calvo durante a celebración do xuízo, un dos documentos correspóndese a un ‘test’ de personalidade do acusado, o profesor de guitarra S.C.S.

Pola súa banda, o segundo deles é un informe pericial que contradí o realizado polo Instituto de Medicina Legal de Galicia (Imelga) que declara “crible” o testemuño da menor, indicou o avogado.

“MÁIS TEMPO” PARA CONTRASTAR DATOS

Unha vez presentados estes documentos, a Fiscalía solicitou a suspensión do xuízo ao considerar necesario “máis tempo” para “contrastar” os datos achegados por estes textos con técnicos “especialistas na materia”.

En concreto, S.C.S está acusado dun delito de abusos sexuais por, supostamente, facer tocamentos a unha menor duns doce anos de idade durante unhas clases de guitarra que tiñan lugar no local parroquial de Santa Baia de Boiro hai tres anos. O fiscal pide que sexa condenado a seis anos de prisión.

Ademais da declaración do propio acusado, para este venres estaba prevista a declaración de nove testemuñas, dous deles por videoconferencia dende os xulgados de Ribeira (A Coruña), de onde procede o caso.