Rueda respecta a protesta contra o hospital de Vigo pero asegura que é un centro público e punteiro

O vicepresidente da Xunta, Alfonso Rueda, expresou o seu “respecto absoluto” cara á nova protesta contra a “privatización” do hospital de Vigo que este mesmo martes congregou fronte ao Parlamento a medio millar de persoas pedindo a dimisión da conselleira de Sanidade, Rocío Mosquera. “Outra cousa é que esteamos ou non de acordo co que se pide”, puntualizou, para remarcar que o centro é “público” e “punteiro”.

Así é que, ao ser preguntado ao respecto polos xornalistas, deu por feito que, a medida que “se vaia poñendo en marcha” e que “se complete o traslado”, os cidadáns de Vigo e a súa bisbarra “daranse conta” de que contan cun hospital “punteiro” e que “se fixo durante a crise mantendo o seu carácter público”.

Dito isto, o número dous do Goberno autonómico criticou “moitas das cousas que se están a dicir por parte dalgúns”. “O tempo demostrará que estaban a faltar á verdade, e ademais conscientemente, o cal é moito máis grave”, remachou.

Cuestionado tamén sobre a posibilidade de que os profesionais convoquen unha xornada de folga de 24 horas, tal e como suxeriron, Rueda sinalou que hai moitos traballadores da sanidade pública na área de Vigo e apostilou que “uns terán unha opinión e outros, outra”.

A liña seguido, engadiu que aqueles que sexan partidarios do paro “están no seu dereito” e que “o único” que pode facer a Xunta ao respecto é “velar para que se manteñan os servizos sanitarios”. Iso si, incidiu en que “con traballo, seriedade e facendo as cousas ben” demostrarase que o hospital Álvaro Cunqueiro “vai ser unha mellora para todo o mundo, empezando polos propios profesionais sanitarios”.