Pontevedra acollerá o festival de cine ‘Novos Cinemas’ no que detectar o talento emerxente

Pontevedra acollerá en decembro un avance a modo de prólogo do Festival Internacional de Cine de Pontevedra ‘Novos Cinemas’, que celebrará a súa primeira edición en 2016 e que tratará de detectar o talento emerxente. Os organizadores contan coa colaboración do Concello e da Universidade de Vigo. Durante a presentación desta actividade, a concelleira de Cultura, Anxos Riveiro, sinalou que un evento destas características era “algo que faltaba dentro da oferta cultural de Pontevedra”, xa que até agora non había ningún certame relacionado co mundo do audiovisual.

Será un festival que, segundo o seu produtor, Daniel Froiz, nace co obxectivo de detectar “talento emerxente” a nivel internacional, así como promocionar e difundir entre a xente máis nova “parte do cine mundial que aquí non chega” e ao que os pontevedreses terán acceso grazas a ‘Novos Cinemas’.

O festival, cuxa programación estará coordinada por Suso Novás e o realizador Anxo Santos, contará cunha sección oficial na que concursarán “primeiras ou segundas” películas de novos realizadores, explicou Novás, “xente que se incorpora á industria do cine”. Haberá ademais outras seccións de exhibición que se irán presentando paulatinamente.

‘Novos Cinemas’ non está concibido só como un evento de dúas semanas, senón que a intención é que sexa un certame que estea presente na cidade durante todo o ano con proxeccións, talleres e conferencias. “Un evento social dirixido a toda a cidadanía de Pontevedra”, destacou Froiz.

“EDICIÓN CERO”

Novás avanzou ademais que os días 11, 12 e 13 de decembro haberá unha “edición cero” do festival. Será, dixo, un “pequeno avance” da liña editorial que terá este certame. Non será competitivo e incluirá a proxección de cinco longametraxes de diversas nacionalidades, tres das cales serán a primeira ou segunda película dos seus respectivos realizadores.

Ademais, os organizadores teñen previsto que un realizador español que para eles é “referencia” no “cine contemporáneo” imparta un seminario teórico, mentres que un cineasta galego recoñecido internacionalmente dirixirá outro, neste caso, de realización. Así, os seus alumnos elaborarán un proxecto que será proxectado no marco da primeira edición do festival, xa en xuño de 2016.