Os visitantes que se acheguen a Bueu poderán degustar 16 tapas mariñeiras por 1.80 euros

A terceira Ruta das Tapas Mariñeiras arranca mañá en pleno apoxeo do FICBUEU,  e remata o domingo. Durante estes catro días, os buenenses e visitantes terán a oportunidade de degustar dezaseis tapas con produtos do mar e a un custe de 1.80 euros. Esta ruta, organizada pola Concellería de Economía e Turismo en colaboración coa hostalaría buenense, ten como obxectivo axudar aos locais hostaleiros da vila e que se identifique Bueu cun produto concreto, neste caso do mar.

Esta ruta está pensada para complementar ao FICBUEU, e por iso o horario de servizo de tapas será de 12 a 15 e de 20 a 22 horas. O restaurante Casa Quintela ofertará “mojito” de aguacate e marisco e quiche de verduritas e xoubas, o restaurante O Pazo sushiño de polbo con titilla e cesto crocante de pao santo con fideos negros e chipiróns, Chilau, cocotas de bacalau chilau e osobucco con salsa de ameixas. Pola súa banda, o Noite Tapas fará as galas con tapas tan misteriosas como o “Octopus revolution” ou o “Pecten X”, e o Rosalinda con polbo ó lume con maionesa de chile chiplote e o Aturuxo Bok  coa tosta de polbo. Por último, Café Bar Nuncia presentará  o arroz con polbo e salsa de curri e os fideos con bacallao e salsa o pinpin, a tapería D’Ons, os chipiróns D’Ons na súa tinta e o revolto de algas con caviar de ourizo e O Farol, o polbo frito e os bocados de batea.

Aínda que todos os locais deben respectar o horario de servizo das tapas, os establecementos Casa Quintela, Chilau, Café Bar Nuncia e tapería D’Ons terán horario ampliado.